Kalipay Sa Makadali

Anaa na sa pantalan si Ruben nga naghulat sa pag-abot sa Supercat aron iyang masakyan paingon sa dakbayan sa Sugbo. Di mokuwang ug usa ka semana ang iyang bakasyon dire sa Bohol. Apan sa usa ka semana, mura na kinig usa ka tuig para kaniya. Dili sayon alang kang Ruben nga biyaan ang mga handurawan sa iyang pag-istar sa Bohol. Ang mga mabulokon nga mga handurawan sa kanunay iyang sigeg hunahuna.

Usa ka bug-at nga kasingkasing ang iyang gidali. Mao ra kini ang iyang pasalubong gikan sa Tagbilaran. Kay para niya lisud ang pag biya ning lugar nga may labing bilinhong mga panghitabo sa iyang kinabuhi nga dili niya madala didto sa Sugbo.

Maiiniton ang iyang pagpuyo ning lugar kuyog sa iyang hinigugma nga si Stella. Gilaag ni Stella si Ruben sa tibuok Bohol ug gilibut nila ang tanang mga maayong panan-awon niining isla.

"Kadaghan ba ug mga kalingawan ning inyong lugar, Stella. Ang akong matan-awan sauna niining isla sa Bohol, ang kani ra gayung isla nga makita nato diha sa may pier." Pulong pa ni Ruben nga mao pa gayuy pagtungtung niya ning maong islaha.

"Abunda gayud sa mga maayong talan-awon ang among lugar Ruben. Unsaon ta man, gihatagan man gyud mi sa labawng makagagahum ug maayong lugar. Ug sa makausa pa, labihan gayud ka relihiyoso ang mga Bol-anon. Pulong pa sa uban nga malunod ang Bohol matag Mayo kay manguli ang tanang mga Bol-anon nga atoa na didto nanglangyaw sa laing dapit.

"Di ba, langyaw man pud ta sauna."

"Aw, dugay na to. Naa naman gani ta'y agi. Unsaon ta man. Di man gyud ni nato malimud nga ang atong kasingkasing dili man gyud mag-bulag."

Gilibot ni Stella ug Ruben ang mga karaang simbahan sa Bohol ug nangadto sila sa Hinagdanan Cave sa Dauis. Didto nakit-an nila ang mga klase klaseng turista, malangyaw man o mga Pilipino nga taga laing lugar ra pud. Dayon mipahulay sila sa usa ka nindot nga beach resort sa Panglao. Tungod kay nag kilum kilum na ug ang adlaw padulong nang mosaop, nanlakaw sila aron tagamtaman ang pagsugat sa kagabhion diha sa baybayon. Gusto sa duha ka managhigugmaay nga magka-istorya tungod kay dugay na kining wala nagkakita.

"Kalit ra man kang nahanaw gikan sa atong gipuy-an, Stella." Batbat ni Ruben.

"Dili nimo masabtan ang akong gibuhat, Ruben."

"Ug ngano man itago man nimo nako ang unsay tinuod? Di ba nagsabot nata nga magpakasal ta inig abot nato sa Pilipinas."

"Dili lang ko andam nga magpakasal pa kanimo. Basta. Palihug, nanganhi ta dire aron dili nato hisgutan nang mga nanglabay na."

"Sige. Basta huna hunaa gayud nga nag huwat lang ko nimo."

Ninghalok sa agtang si Ruben ngadto kang Stella. Ang duha ka managhigugmaay nagpungko daplin sa baybayon samtang nagpabasa ang ilang mga tiil sa mabugnaw nga tubig sa dagat. Ug ilang gitagamtam ang ka pino sa mga balas ning baybayona.

"Nakahinumdum pa ba ka nga katong nagkita ta didto sa California. Abi man gud nako ug usa ka nga Amerikana. Di man gayud nako mahibaw-an nga Bol-anon diay kang dako."

"Ikaw pud no. Imo pa gyud diay nang gihinumduman ang atong mga nangagi. Hangyo ko lang nimo Ruben. Ayaw na ug pagpuyo sa kagahapon. Aduna kay kaugmaon. Ang magpayo sa kagahapon usa ka tawo nga dili gustong makakita sa iyang kaugmaon."

"Apan ang walay pagpakabana sa kagahapon, wala puy alam kung asa ang padulngan."

"Sakto ka. Apan, wala baya gyud nako gihingpit ang pagtak-om sa mga handurawan nato sa kagahapon.Akoa pa ning gihandom ug maayo."

"Salamat nga imoha nang gisulta, Stella. Gihigugma ko ikaw."

"Gihigugma pud tika Ruben."

Gihagkan ni Ruben ang hinigugma nga gibalusan pud siya niini. Ug nanlakaw sila paingon sa ilahang lawak. Dihang gisirad-an nila ang lawak. Giingkib sa makalit ni ruben ang ngabil ni Stella. Mao na lang pud ang gibuhat ni Stella sa hinigugma ug sa makadali gihubo ang two piece ug ni Stella nga nagtabon sa mga pribadong parte niini.

Gihubo pud ni Ruben ang kaugalingong sapot ug gihagkan niini ang hinigugma. Nagkainit ang romansa sa duha ka managhinigugma. Mas init pas kalayo. Ug ang dugos sa ritual sa gugma gisawo sa duha. Ang kahinam sa duha dili gayud masukod. Murag nag-abot ang langit ug yuta. Ug ang mga agulo nilang duha labihang katam-is. Mga agulo sa tumang kalipay nga dili matungkad. Ning gabhiona, ang ilang panaghilawas dili lang sa pisikal nga kahinam apan masinata pud sa duha ang ilang mga kalag nagduyog sa tukmang musika sa gugma.

"Salamat Ruben."

"Gihiguma tika, Stella." Sulti ni Ruben samtang nag hapuhap sa blond nga buhok ni Stella.

"Basta salamat sa tanan."

Ang duha nangatulog sa katre. Ug sa wala pa'y banagbanag, ningmata si Stella ug nag-ilis. Iyahang gikuha ang iyang bag ug may gibutang ni sa lamesa nga dapit sa ulohan ni Ruben.

Dihang nimata na si Ruben. Nakita ni ang usa ka sulat nga nag-ingon.

Dear Ruben,

Ayaw nako pangitaa. Usa na ako ka minyo ug dili ko gustong makit-an ka sa akong bana. Naka-minyo ko ug usa ka sindikatong Insik. Di ko gusto nga makit-an pa ka nila. Ako ra kining pasangil nga mouli ko sa Bohol aron makita tika. Salamat kaayo nga imoha kung gilipay. Wala koy kalipay sa akong bana. Anaa ang akong kalipay nimo. Salamt sa tanan.

Stella


Ang hinigugma nga kalit nang nawagtang alang kang Ruben, nahanaw napud kini. Apan nagpabilin gihapon ang mga handurawan nga dili na mawagtang sa iyang huna huna.

Ninglabay ang pila ka panahon.

"Bay Ruben, ikaw napud diay duty dire sa receiving desk."

"Oo bai."

"Abi nako ug day-off ka karon."

"Overtime lang ko kay ganahan pud ko. Silang misis tua man gud sa Leyte ug ako ra usa sa balay."

May niduol nga usa ka Amerikano kanila nga gustong mo-check. Daghan kinig alahas ug makaingon gyud ang motan-aw niini nga kuartahan gayud siya. Dayon sa luyo kuyog niya ang usa ka babaye nga may blond ang buhok ug kulot. Ug dayon nikalit ug paspas ang pitik sa dughan ni Ruben. Nakita niini ang mga lawom nga mata ni Stella. Apan nikidhat lang kini niya.

Dayon gikuha sa mga bellboy ang bag sa duha ka managti-ayon.

"Biliba nako anang bayhana, Ruben."

"Ngano man bai. Sonny?"

"Bisag kinsa man kana ang iyang kuyog dire."

"Aw, mao ba. Bag-o pa man gud ko dire ning maong hotel."

Sa huna huna ni Ruben, nahigugma siya kanhi sa usa ka babaye nga wala siya nasayud kun unsay pagkatawo. Kalit lang nawagtang ug kalit lang nibiya. Apan ang handuraw sa ilang panaghigugmaay dili gayud mawagtang